October 30th, 2009: Premio mayo dia di bestia, 1 min Cultimara sin paga - Kumpra kos sin pa un minut sin paga

Resientemente Supermarket Cultimara tabata riba bou. Señora Mirna Soleana ku a gana e premio mayó den e kompetensha riba Dia di Bestia, a bai piki kos pa 60 sekònde largu sin mester a habri su pòtmòni ora el a yega kaha!
 
Den kuadro di Dia Internashonal di Bestia, STINAPA, huntu ku fundashon Asilo di Bestia i dòkter di bestia Fulco de Vries, a organisá un aktividat den Parke Publiko. Mas ku 200 hende a bai ku nan bestia di kas den e parke. Esun ku mas mihó a kuida su bestia a gana e premio mayó i e por bai piki kos na Cultimara pa 60 sekònde sin nodi di paga.

Señora Mirna Soleana, kende a gana e premio mayó, a prepará su mes hopi bon pa e okashon aki. E tabata sa presis kiko e ta ke, i kua tabata e ruta mas kòrtiku pa e por yega na e merkansianan ku tabata riba su lista di deseo. Señora  Mirna a kalentá promé ku a start e “stopwatch”. Despues di kore e kore kore pa un minüt largu, el a yena su garoshi ku kuminda kachó, bòter grandi di zeta dushi, bleki di lechi, dos kaha di serbes, un kaha di Sprite, bruki, papel di w.c. etcetera, etcetera. Ora ku Señora Mirna a yega na kaha e tenshon tabata grandi. Tur presenta ta ke sa kuantu sèn el a gana. Na total Señora Mirna su kompras a sali kuatershentitrintitres florin ku nobentishete sèn.

Un danki spehal ta bai pa Cultimara Supermarket i un agradesimentu ta bai na tur, ku den un òf otro forma a kontribuí pa a hasi e evento aki un eksito!

 

« Close window