October 30th, 2009: Porta di Slagbaai habri pa publiko

E porta di suit di e parke nashonal Washington Slagbaai ku ta bai stret pa slagbaai lo ta bai ta habri pa publiko riba e promé djadumingo di tur luna. Na Slagbaai tin e playa di santu di mas largu despues di Klein Bonaire i Boka Chikitu.

Konsiderando e publiko grandi ku e akudí na Slagbaai riba e dia di selebrashon di aniversario di 40 aña di èksistensha di e parke nashonal. E tantisimo petishon ku STINAPA a risibí pa ripitishon, direktiva di STINAPA a disidi ku ta bai habri e porta di suit di e parke riba e promé djadumingo di kada luna kuminsando den e luna di novèmber.

Pa e aña aki e entrada lo ta gratís. Pa otro aña publiko lo por kumpra e pas di aña ku ta kosta fl. 17.50 i ta balidó te fin di aña. Ta bende e pas di aña aki na entrada prinsipal di e parke òf na ofisina di STINAPA. Tambe ta bende nan na tur skol di buseo na Playa. Pa motibo di siguridat, lo no atendé ku sèn en efektivo na porta di suit. Si un hende no ke kumpra e pas di aña e lo tin di paga fl 5 kada biaha ku e ke drenta parke i e tin di paga esei na e entrada prinsipal i bin ku e bòn porta di suit. Pa fasilitá e publiko, STINAPA lo tene un lista di tur hende ku a kumpra e pas di aña. E pas ta riba nòmber di un pèrsona i no por pasé pa otro hende. STINAPA ta keda ku e derecho di puntra su bishitantenan pa identifikashon ora tin duda si e pas ta di e pèrsona na porta asina ku nos ta rekomendá pa bin ku bo sédula. Si e pèrsona no por identifiká su mes e lo no por  drenta e parke.

Na Slagbaai tin awor un bich di santu blanku fini masha dushi mes, a kita e piedranan for di riba e playa. Den e edifionan tin un bar i un bon kushina pues STINAPA ta invitá pueblo di bin gosa di su parke i e naturalesa di Boneiru. Tur regla di e parke ta konta. No por drenta e parke despues di kuartu pa tres i tin di sali for di Slagbaai 4 or.

 

« Close window