October 6th, 2009: ORGUYOSO DI DIN DOMACASSE (DIN DOMACASSE TA RISIBI CHEK DI 20.000 EURO)
Edwin Domacassé, Chief Ranger di e parke submarino di STINAPA a traha dilanti di kamera di televishon, el a risibí e kondekorashon di mas haltu di Postcode Lotterij i un chèk di 20.000 euro.
Siman pasá Din tabata artista di televishon. Mientras ku e tabata hasi su trabou komo Chief Ranger den nos parke submarino, kameranan tabata graba Din den su funshon. Esaki a sosodé pasobra Din a keda postulá pa Wereld Natuur Fonds di hulanda pa e risibí e kondekorashon di ‘Gouden Wimpel’ di Postcode Lotterij. E kondekorashon aki ta esun di mas haltu ku Postcode Lotterij ta duna na un hende ku ta dediká su mes pa un mihó mundu. Di e moda aki a rekonosé Din, kenda pa mas ku 15 aña kaba ta traha na STINAPA i tur dia, ku su alma, amor i dedikashon e ta sali dilanti pa protekshon di nos naturalesa di bou di laman. For di hulanda a bin Boneiru un ekipo di televishon pa a graba Din den su trabou. E presentadó di televishon popular, a bai tur kaminda ku Din mientras e tabata hasi su trabou i nan tabata film’é. Riba un atardi huntu ku e ekipo di filmashon, sintá na kas di su tata, Ròni Domacassé, huntu ku su kasá i yunan Din a haña e sorpresa di su bida; Postcode lotterij a paga pasashi pa Din su yu muhé, Geraldine bin Boneiru huntu ku nan. Din ta tin 7 aña sin wak su yu muhé. Derepente Geraldine a presentá su dilanti. E momento ei tabata unu hopi emoshonal pa Din i ku awa na su wowo el a kohe su yu brasa bisando ku e no por kere kiko ta pasando.
Su sigiuente dia Din a bolbe haña un sorpresa. Riba e playa di trapi (1000 steps), despues ku Din a kaba duna muchanan lès di snòrkel, el a haña e notisia ku el a keda kondekorá ku e ‘Gouden Wimpel’ di Postcode Lotterij. Su yu muhé, Geraldine kende a kaba haña lès di snòrkelmentu, a entregá su tata e chèk di 20.000 euro. Din tin mag di partisipá den e desishon kon STINAPA lo bai usa e plaka. E dia despues riba Klein Bonaire Din a haña e feneta di pechu di oro den e forma di un‘wimpel’.
E programa di televishon ku a graba aki na Boneiru lo pasa na e kanal di televishon hulandes RTL 4 den e programa yamá “Kanjers van Goud” di e presentadó Winston Gerschtanowitz. E lo pasa dia 13 di desèmber pa mitar di diesun di anochi, ora di hulanda. Ya STINAPA a hasi e petishon kaba pa por pasa e filmashon aki na Boneiru tambe. Di parti di Postcode Lotterij i Wereld Natuur Fonds nan lo regla e asuntu di derecho pa asina nos por presentá e programa na televishon na antia tambe.STINAPA kompleto ta yama Din pabien bisando e ku nos ta orguyoso di dje.