September 25th, 2009: DJADUMINGO DIA 4 DI OKTOBER DIA DI BESTIA
Den kuadro di Dia Internashonal di Bestia, STINAPA, huntu ku fundashon Asilo di Bestia i dòkter di bestia Fulco de Vries, ta organisá un akshon pa pone atenshon riba kuido di bestia. Lo tin chekeo grátis pa e bestianan presenta i esnan ku ta kuida nan bestia mas mihó por gana premionan atraktivo. E meta di e akshon ta pa premia esnan ku ta duna bon kuido na nan bestianan di kas i usa e ganadónan komo ehèmpel.
Dia 4 di òktober for di 4 or te 6 or di atardi, lo tin un happening grandi den Parke Públiko (patras di Hòspital). Dòkter di bestia señor Fulco de Vries, lo ta presente pa chèk bestianan di kas. E ta wak kon e salú di e bestianan ta; e kondishon di nan kueru, nan nutrishon, nan wowo, nanishi, orea ètsetera. Tambe, e ta wak kon e bestia ta komportá su mes den hende i rondo di otro animal. Organisadónan ke duna nos komunidat e oportunidat pa haña un chekeo pa nan bestia grátis i risibí konseho di kuido sin mester paga pa esaki. Tambe tur presente tin e oportunidat pa gana premionan atraktivo.
Lo tin un demonstrashon live di un training di kachó. E entrenadó di kachó aki lo mustra esnan presenta kon por train un kachó pa e tende i hasi loke su doño ta orden’é. Lo tin tambe un marshe ku lo bende kosnan di bon kalidat segundamano pa bon preis. I mas ku klaro lo tin hopi kos di kome i bebe!
P’e chikitinnan tambe tin hopi kos di hasi: Lo tin kompetensha di pintamentu, un show di Magic Ed, wega, kusinchi grandi di aire, i tambe suikerspin i pòpkòrn! Muchanan por partisipá na un kompetensha di pintamentu kaminda por gana premionan bunita. Lo print e pinturanan di mas bunita riba un T-shirt i e muchanan por bai kas kuné.
Lo anunsiá e premionan riba e dia ei mes den Parke Públiko. Dòkter Fulco de Vries mes lo saka e ganadónan.
Por gana entre otro un trep riba e yate Aquaspace, un ora di landsailing pa dos persona na Landsailing Bonaire, un trep pa dos persona pa bai kayak huntu ku e guianan di Mangrove Infocenter den Lac, hopi T-shirt, keiru un dia ku un di e Rangernan di STINAPA, un tèst di sambuyá pa dos persona na Dive Friends Bonaire, un èkstra large pizza na Pasa Bon Pizza, un pakete di kosnan pa uso di bestia, Paradise Photo lo hasi algun potrèt grandi i entrada pa dos pèrsona den Butterflyfarm.
Pero esei no ta tur kos, e premionan mayó lo ta: Hasi kompra na balor di fl. 200 na Bonaire Warehouse i kumpra kos na Cultimara Supermarket pa 60 sekònde largu sin mester habri pòtmòni na kaha!!!