August 29th, 2008: Parke submarino ta pone ankernan moderno
Kralendijk- Algun di e promé ankernan ku a keda poné bou di nos laman ta data for di temporada promé ku a establesé parke submarino ofishalmente. E ankerenan a hasi nan trabou pa mas ku 30 aña i awor a yega e ora pa kambianan pa ankernan mas moderno.
Resientemente empleadonan di STINAPA/Bonaire National Marine Park a kaba ku e trabou duru di bora den fondo di laman pa instalá 13 anker nobo. E parke submarino a haña fondo pa esaki for di Fundashon Project Aware. Kambia e ankernan tabata un di e prioridatnan grandi di e parke, ya ku e ankernan bieu (barí di zeta yená ku betòn) no tabata hasi e trabou mas. Awendia Boneiru tin mas boto. E botonan a bira mas grandi i mas pisá. Ta p’esei ku e ankernan bieu no tabata sufisiente fuerte mas, i nan a kuminsá lastra riba fondo di laman i nan ta hasi daño na nos refnan.
A instalá e ankernan nobo na 13 sitio di sambuyá, fo’i kosta sùit wèst te nort wèst, fo’i Tolo te ku Pink Beach. Tin planiá pa instalá 3 òf 4 di e ankernan nobo aki mas, den serkania di “No Name Beach” di Klein Bonaire.
Nos por ta hopi orguyoso, pasobra Boneiru ta e lider mundial den preservashon marino. Hopi tempran Boneiru a realisá ku tira anker ta hasi hopi daño na nos refnan. Ta p’esei ku hopi aña pasá, for di promé ku e parke tabata tin maneho permanente e skolnan di sambuya a tuma inisiativa pa instalá ankernan permanente na e sitionan di sambuya. E promé ankernan permanente a keda instalá na aña 1978. Nan tabata trahá di dos barí di zeta di 55 galòn. WEB a hasi donashon di e barínan i studiantenan di ‘technische school’ a las nan na otro. Despues di algun aña e botonan a bira mas grandi, i gerensha di e parke submarino a laga traha algun anker di blòki di betòn. E ankernan aki por ekspandé ku otro palabra, por pone mas bloki na otro, ta pega nan ku kabel, si tin mester. Den kaso di e ankernan di barí di zeta no ta por hasi nan mas pisá i awor ku botonan a bira mas grandi no tin otro moda ku di saka nan for di den sirkulashon pasobra nan ta hasiendo daño. A bin ku un solushon moderno ku ta un tipo anker ku yamá ‘Helix mooring’, esaki ta manera un skruf grandi ku ta bai den fondo di laman. Por traha e skrufnan ku ta usa komo anker aki na Boneiru mes. Ku un kòmprèsòr ta duna koriente na e ‘boormachine’ bou di awa i ta manda e skruf den fondo di laman. Ora ku el a drenta ta pone su renchi i kabuya i e bui i e ta kla pa traha su trabou.
Un sistema di anker di ‘Helix’ ta basta karu, anke ku parke submarino tin e kòmprèsòr for di basta aña i a pone algun anker di ‘Helix’ kaba, no ta tin fondo pa a kambia esnan di barí di zeta pa anker di ‘Helix’. Pa pone kada anker di ‘Helix” ta kosta ku tur gastu aden, mas o menos mil florin pa kada anker.
Mientras e barí di zetanan tabata traha trabou komo anker nan a bira parti di nos ref pasobra ku koral a krese ribanan i piská ta usanan komo nan kas. Asina es ku nan lo keda bou di awa kaminda nan ta awor pa semper.Kiko ta e funshon di un anker i dikon tin e lei ku ta prohibí un boto di tira anker den nos parke submarino? Un anker permanente tin un funshon vital pasobra e ta protehá nos refnan i mesora nan ta duna e botonan e seguridat ku e ta bon ankrá. Ankernan permanente ta eliminá e nesesidat di tira anker, i asina hasi daño na e koralnan ora ku e kadena i anker keda lastra riba nan.
STINAPA/Bonaire National Marine Park ke gradisí e dunadó, Fundashon Project Aware, pa duna nos e oportunidat, di tuma un di e medidanan nesesario pa kuida nos refnan. Pa asina nos yunan i nan yu awe i den futuro, por gosa di nos bunita naturalesa bou di laman.