May 5th, 2008: E KAMINDANAN DI PARKE NASHONAL WASHINGTON SLAGBAAI DEN BON KONDISHON
Resientemente e kamindanan di Parke Nashonal Washington Slagbaai a keda restorá. E situashon di e kamindanan a mehorá di tal forma, ku awor tur tipo di outo por kore fásil.
No muchu tempu pasá STINAPA tabata rekomendá pa drenta Parke ku pikòp òf djip, pero awor ta posibel pa bai ku outo di famia tambe. A drecha tur e kamindanan. Tin dos ruta den Parke, un ruta kòrtiku di 24 km. i un ruta largu di 34 km. Tur dos ruta a keda restorá. A tuma mas o ménos kuater siman pa a hasi e trabou. Damascus Construction a hasi’é bou di supervishon di e Chief Ranger di e Parke, George Thodé (Kultura).
E mantenshon di e kamindanan ta un tarea kontinuo i hopi kostoso. Áwaseru duru i hopi tráfiko ta daña e kamindanan. STINAPA ta spera ku nan por haña e fondonan nesesario pa por drecha e kamindanan na un manera ku ora áwaseru yobe duru e no laba e tera bai kuné. Tin di drecha e sistema di kanalisashon di e awa, un trabou ku lo kosta hopi plaka i te ainda STINAPA, ku ta manehá e parke aki pa gobièrnu di Boneiru, no a haña fondo pa hasi e trabou aki. Miéntras tantu ta kada aña ta keda hinka sèn den mantenshon ku ta laba bai ora awa yobe duru.
Pero e bon notisia ta ku e kamindanan ta den bon kondishon atrobe. Bin eksperenshá e diferensha. Bin disfrutá di e naturalesa i trankilidat ku e parke ta ofresé.
Pa mas informashon yama STINAPA Bonaire na telefon 717 – 8444 òf Parke Nashonal Washington Slagbaai na telefon 788 - 9015.