October 31st, 2007: Mas informashon tokante di zona pa protekshon di piska

Kralendijk: STINAPA riba petishon di gobièrnu ta sigui duna informashon na pueblo pa asina por komprendé kiko ta pasando ku nos piská di ref nan i kiko ta e solushon pa e problema.

STINAPA huntu ku e departamentu di DROB su sekshon di maneho di naturalesa i medio ambiente aña pasá a duna un konseho ámplio na gobièrnu tokante di e estado di nos piskánan di ref i kiko por hasi pa remediá e situashon. E konseho ta splika ku sientifikamente a keda komprobá ku e piskánan ku ta biba riba nos ref, esta esnan ku di e famia di Robèki, Purunchi, Gristèlchi etcetera a baha asina tantu ku masha poko ta haña nan den estado di adulto. Mayoria ta den estado hubenil pa adolesente. Piskadónan lokal tambe a komprobá ku piskánan ku nan ta pega ta mas chikitu ku ántes i ku ta dura mas largu pa nan pega un piská. E solushon ta pa sera un zona i protehá e piskánan den dje. Aña pasá gobièrnu a manda pidi STINAPA pa huntu ku su funshonarionan di DROB su sekshon di maneho di naturalesa i medio ambiente i piskadónan duna nan konseho na unda nan pone e zonanan di protekshon di piská aki. A tene e reunion i a yega nan un entendimentu. A skohe dos sitio pa pone e zonanan. Un ta di Punt’i Waya pa e parti nort di Harbour Village Marina i di dos ta di Chachacha Beach pa e parti nort di Plaza Marina. Den e dos zonanan ei tur piská lo ta protehá i lo no por piska fòndu. E piskadónan a pidi pa nan por piska riba piská di as i no ta tin problema ku e petishon ei. Awor ku gobièrnu tin e konsepto di lei pa nan aprobá a pidi STINAPA pa duna mas informashon na pueblo. Durante e seis simannan ku ta sigui lo duna informashon na pueblo pa asina por komprendé dikon ta importante pa tin piská di ref.  E siman aki a habri ku Dr. Dolfi Debrot di CARMABI kende a bai radio huntu ku Din Domacasse pa a duna informashon. E simannan ku ta sigui den e kolumna semanal ‘STINAPA ta informá’ ku ta sali den Extra, Nobo, Ultimo Notisia i Antiliaans Dagblad lo publiká diferente artíkulo relashoná ku e tópiko di piská di ref i nan importansha pa hende i pa naturalesa. Lo publiká diferente relato den prensa i lo duna informashon na radio i televishon (BOTV). Si tin kualke hende ku ta sinti ku e mester di informashon adishonal òf e ke hasi pregunta e por yama na STINAPA su number ta 717 8444 òf e por e-mail na info@stinapa.org.

Photo: Un piskado di antes ku un Djufes grandi, un tipo di piska ku kasi no ta pega na lina mas.

 

 

« Close window