June 3rd, 2012: Komunikado-Selebrashon, dia habri na Parke Nashonal Washington Slagbaai – un eksito atrobe
Djadumingu dia 3 di yüni STINAPA a duna pueblo di Boneiru e oportunidat pa nan partisipá i eksperensiá e bunita áreanan protehá di e parke nashonal Washington Slagbaai. Milunshentikuarentidos (1.142) hende a e drenta parke djadumingo último. Grupo ESO i Tutifruti a entretené e publiko mientras ku e kuminda nan ku a sirbi a kai na agrado di un i tur.
For di 8’or di mainta doñonan di stènt a kuminsá instalá nan produktonan. Pa mèrdia e kuminda krioyo tabata kla i tambe e barbekiú. E biaha e aki asta truk di shoarma tabata tin. Henter dia nan a bende bolo, kosnan di boka dushi i diferente artefaktonan di obra di man i mata. E bonkune no por a keda fó. E ambiente musikal tabata na enkargo di grupo Tuti Fruti, i ESO. E públiko a balia i a gosa na nan mesté. George ‘Kultura’ tambe a kanta i asina entretené e publiko presente.
Basta hende, grandi i chikí, a partisipá na e tournan ku guia ku STINAPA a ofresé. Nan a subi Brandarisi Kasikunda i a kana e kaminata di Lagadishi Walking Trail. Slagbaai tabata e sitio kaminda hendenan tabata tin mas interes pa nan a bai. Hopi mucha a bin pinta den e ‘Huki di Mucha’ ku a krea riba e dia ei.
E Junion Rangersnan di STINAPA a hasi un bon trabou dor di entretené e muchanan i hasi wega edukashonal ku nan.
Na total a drenta shentikuarentiocho (148) outo den kua ta tin sinkushentisesentishete (567) hende den parke. Na entrada a keda sinkushientisetentisinku (575) hende.
Den tra’i mèrdia tabata tin sigur mas ku shen outo na Slagbaai, e laman tabata yen di hende.
Milunshentikuarentidos (1.142) persona a bin selebrá huntu ku STINAPA ku e promé Parke Nashonal di Boneiru a kumpli 43 aña.
STINAPA ke yama danki na tur ku a hasi e dia aki posibel. Tur e empleadonan di STINAPA, SKAL, Mangazina di Rei, Klup di damas Rinfa i Grupo Tutifruti. Tabata un dushi dia i tur kos a bai na òrdu.
