December 17th, 2011: Komunikado-Ganadonan di Puzel ta Pasa Dia Den Parke Washington
Resientemente un grupo di diesdos (12) hóben a pasa dia den parke Washington Slagbaai. Nan a traha i a entregá e pùzel ku STINAPA a publiká den korant Extra i a resultá ta eganadónan di aktividat aki.
Na vários okashon STINAPA ta publiká pùzel den korant ku muchanan por traha i entregá esaki i asina partisipá pa gana un premio. E último pùzel ku STINAPA a publiká tabata den luna di novèmber en konekshon ku e Festival di Planta Palu.
Un total di 24 pùzel a keda entregá. Entre esnan ku a traha e pùzel tabata tin adulto tambe. A skohe seis (6) hóben ku a traha e pùzel kompletu i korekto pa nan partisipá den un aktividat huntu ku NME STINAPA. Eseinan tabata; Kevin Peters, Kevin Christiaan, Marilliana Rojas, Tyrsa Veld, Carlos Mario Mejia i Mishairainny Balentin.
Nan tur a trese un kompaño pa partisipá tambe huntu ku nan den e aktividat. Nan a bai for di mainta ku bùs parke i a keda te atardi. Apesar ku tabata un dia di awaseru, e muchanan a gosa masha tantu mes. Nan a partisipá na diferente aktividat manera plantamentu di palu, wak pelíkula i presentashon tokante di naturalesa, kana e ”Lagadishi Walking Trail” i nan a risibí masha hopi informashon tokante di mata, para, kangreu, i hopi mas.
Riba e dia aki NME a konta ku asistensha di Junior Ranger, Gideon Goedgedrag komo lider. El a hasi un bon trabou huntu ku boluntario Nancy Reuten ku tambe a duna su bon koperashon. Danki na nan asistensha e aktividat aki a bira un èksito i e muchanan a pasa un dushi dia den naturalesa.
