June 27th, 2011: Komunikado-Dos hóben a risibí sertifikado di ‘JUNIOR RANGER’
Departamentu di edukashon di STINAPA ta orguyoso di e dos hóbennan ku a logra pasa tur e tareanan di e kurso di Junior Ranger.
E hobennan ku ta bai Jong Bonaire despues di skol por skohe entre diferente aktividat. Un di nan ta e programa di Junior Ranger ku STINAPA ta ofresé. Junior Ranger ta un programa ku kasi tur organisashon na mundu ku ta protehá areanan ta ofresé. STINAPA ta ofresé e programa aki ya pa kasi 5 aña na e hobennan ku ta bai Jong Bonaire.
E meta di e programa ta pa e hobennan haña smak den protekshon di naturalesa, pa nan siña mas tokante di e flora i founa i tambe pa nan sa kiko ta nifiká ta un Ranger i asina ke bin traha e trabou ei na STINAPA.
E dos hóbennan ku a kaba e kurso e biaha aki nan nòmber ta Rayen Seraus i Gideon Goedgedrag. Tur dos tin 15 aña di edat. Nan a kompletá un kurso basta largu. E kurso a dura shete luna. E kurso tabata inkluí e siguiente lèsnan: komunikashon básiko, identifikashon di piská, identifikashon di koral, identifikashon di mata, identifikashon di para, geología básiko i di Boneiru, historia di e dos parkenan, biología básiko, mekániko básiko, kore boto. Despues ku nan a pasa tur e kursonan menshoná ku èksito, nan a tuma e kurso di sambuyamentu ‘PADI Open Water’ i a pasa esei tambe ku èksito. A kuminsá ku un grupo di ocho hoben i e dosnan aki a demostrá preseveransa i smak pa logra algu. Ta pesei STINAPA ta hopi orguyoso di nan dos.Awór ku nan tin nan sertifikado, STINAPA lo sòru pa nan sigui sambuyá pa haña mas práktika i usa e abilidatnan ku nan a haña durante di e lèsnan. Nan tin un skèdjul pa kumpli kuné i nan lo haña entrenamentu den práktika na diferente organisashon manera na; parke nashonal submarino mes, e programa di restorashon di Lac, CIEE i tambe na e skolnan di sambuyá manera Dive Ink, Buddy Dive, Divi Divers i Toucan Divers.
Un danki speshal ta bai na Captian Don’s Habitat Resort pa a duna e kurso di sambuyamentu na e hóbennan. Tambe danki na tur ku a koperá pa hasi e kurso di ‘Junior Rangers’ un èksitoso. Danki pa yuda STINAPA su programa pa krea interes den protekshon di naturalesa.
