June 6th, 2011: Komunikado-STINAPA ta bolbe saka ganadó di e kampaña di bùmper steker
Komo parti di e kampaña di konsientisashon tokante di karkó STINAPA ta premia esnan ku tin un steker di e kampaña riba nan outo. E ganadó di biaha aki ta e vehíkulo ku e plachi di number 3977 B. TELBO NV ta regala un aña di internet i MiTV.
Komo parti di e proyekto di restorashon di karkó den Lac, TELBO a kontribuí ku un aña di internet i MiTV pa e ganado di STINAPA su kampaña di bùmper steker. Pa esnan ku suerte no a toka nan e bia aki, meimei di luna di Yüni nos lo bolbe saka un ganadó.
Pa un aña largu, kada dos siman, STINAPA su hende nan lo paga tinu riba outo nan riba kaya ku tin e steker pegá i saka potrèt di nan plachi di number i publiká esaki den korant ku e premio ku ta korespondé na dje.
E ganadó di e kampaña e siman aki ta bira doño di e outo riba e potrèt ku plachi number 3977 B. STINAPA ta pidi doño di e outo pa tuma kontakto mas pronto ku ta posibel ku ofisina di STINAPA na telefon 717- 8444, di manera ku nos por traha un sita pa entrega di premio. Pa esnan ku ke sa ken ta ganadó di e kampaña i sigui aktividatnan di STINAPA mas di aserka, por bai riba nos dos páginanan di FACEBOOK; Karko Bonaire òf NME STINAPA.
STINAPA ta hasi un yamada na tur outomobilista pa nan plak e steker riba outo pa nan por kai den e premionan fabuloso ku lo keda repartí. Esun ku no tin nan steker ainda por pasa tum’é na ofisina di STINAPA na Barcadera.
BAN TRESE KARKO BEK, LAGA NAN NA PAS - PA MAYAN NOS TIN MAS.
