May 17th, 2011: Komunikado-Entrega di premio na ganadó di e kampaña di bùmper steker di STINAPA
Djabierne, 13 di Mei MCB Bonaire a entregá un Moneycard di MCB na Sr. Alvin Trinidad, otro ganadó di STINAPA su kampaña di bùmper steker. Sr. Trinidad a pega steker riba su outo i asina a partisipá den e kampaña di konsientisashon di karkó: Laga nan na pas, pa mañan nos tin mas. Keda pendiente pasobra komienso di e siman aki mes lo bai saka mas premio pa esnan ku tin steker pegá riba nan outo.
Sra. Lily-Ann Janga, representantenan di MCB a entregá Alvin Trinidad un Moneycard.
STINAPA ta yama danki na MCB Bonaire i Sra Lily-Ann Janga ku a kontribuí ku e kampaña di bùmper steker di STINAPA.
Pa esnan ku suèrte no a toka nan e bia aki, e siman aki tin un chens mas pa kai den premio.
Pa un aña largu kada dos siman STINAPA su hendenan lo paga tinu riba outo nan riba kaya ku tin e steker pegá i saka potrèt di nan plachi di number i publiká esaki den korant ku e premio ku ta korespondé na dje.
STINAPA ta hasi un yamada na tur outomobilista pa nan plak e steker riba outo pa nan por kai den e premionan fabuloso ku lo keda repartí. Esun ku no tin nan steker ainda por pasa tuma esaki na ofisina di STINAPA na Barcadera, MCB Playa i Hato, na entrada di Washington Park, of serka e rangernan di STINAPA.
