Fabruari 4th, 2011: Loranan ta difísil pa konta
Kralendijk – Durante e kontamentu di lora anual di djasabra último, a konta masoménos 550 lora. Esei ta muchu ménos ku e kantidat di 800 ku a konta aña pasá. Fundashon Salba Nos Lora ta pensa ku e motibu pa esaki ta ku e loranan a plama mas riba e isla.
Fundashon Salba Nos Lora i e Departamentu di Medioambiente i Naturalesa a logra trese 30 boluntario huntu pa logra nan meta. Nan a konta na 15 lugá na parti meimei i nort di Boneiru. Empleadonan di STINAPA a efektuá konteo na 10 sitio den Parke Washington – Slagbaai Park. E aña aki atrobe tabatin studiante di Komunidat di Skol Boneiru (SGB).
Na 9 sitio no a mira ningun lora.
Pero tòg tabatin hopi entusiasmo bou di e boluntarionan. Ta un oportunidat úniko pa ta presente na un lugá bunita den naturalesa pa skucha i wak naturalesa lanta fo'i soño. “Di adilanti nos tabata konsiente ku e di 16 konteo di lora lo tabata bai bira difísil”, tabata palabranan di Hensley Anthony i Jan Jaap van Almenkerk di Salba Nos Lora. “For di fin di aña pasá a señalá e loranan den barionan residenshal, siendo ku normalmente nan ta kedando den mondi den e temporada ei”.
E temporada di áwaseru i e abundansha di kuminda den mondi ta faktornan importante den esaki. Ora naturalesa no tin sufisiente kuminda, e loranan ta bai den barionan habitá pa buska kuminda. E palunan i matanan no por ofresé e loranan sufisiente kuminda durante hinter e aña. Dor di e komementu kontinuo di vegetashon di mondi dor di buriku i kabritunan, e vegetashon aki ta hopi similar. Hopi mata i palu idéntiko. Pa subi e variashon di matanan Fundashon Salba Nos Lora ta planta hopi palu i mata krioyo último añanan. Hopi di nan ta karga fruta manera kalbas, oliba, watakeli i wayaká.
E konteo di lora a ser klousurá ku un desayuno na entrada di Parke Washington – Slagbaai ku STINAPA Bonaire a ofresé e boluntarionan.
------------------------------------------------------
Foto: Salba Nos Lora
Teksto: Parti di e boluntarionan di konteo di lora 2011
