Januari 31th, 2011: Stinapa ta informá ku desde djaluna 31 di Yanüari 2011, bishitantenan por yega Slagbaai atrobe
Kralendijk - Awor por yega Slagbaai atrobe ora bishitá e parke nashonal Washington Slagbaai. Solamente pikòp òf outo haltu por drenta den parke.
E restorant na Slagbaai tambe lo ta habrí. Pa sali for si den parke tin di kohe ruta kòrtiku.
Parke Washington tabata será pa diferente dia pa motibu ku e kantidat grandi di áwaseru ku a asotá nos den e di dos mitar di 2010. E awa ku a kai a hasi basta daño na e kamindanan. Pa por a habri e parke mas pronto ku ta posibel, momentu ku awa a para un poko a hasi reparashon di emergensia na e kamindanan. Algun siman pasá a habri e parke atrobe ku un ruta alternativo. Na e momento aki tin un ruta so den parke. No por skohe entre ruta kòrtiku i ruta larga. Despues ku sali for di entrada prinsipal ta kohe e ruta largu i por yega te Slagbaai. E kambio den ruta ta ku ora sali di Slagbaai. Ei tin di bai nort. Lo bolbe riba e mesun ruta rumbo pa Daiboi. E parti ei lo ta di dos via i tin di tene kuidou ku outo ku por ta bin di direkshon kontrali. Na Daiboi ta kohe e ruta kòrtiku pa yega na e porta prinsipal pa por sali. Lo tin bòrchi ku ta duna indikashon i instrukshon.
E awa den saliña di Slagbaai ta haltu ainda i no tin sufisiente espasio pa pone outo. Pa e motibu ei a krea un área di parker ariba na Slagbaai i e bishitantenan ta baha na pia pa yega e bich i e edifisionan di Slagbaai. STINAPA a hasi tur su posibel pa a bolbe habri e parke i ku su mes forsa finansiero a drecha e kamindanan ta kaminda ku e ta por. Solamente pikòp i outo haltu por drenta den e parke. E bar/restorant na Slagbaai lo ta habrí pa sirbi kos di bebe i di kome.
Esun ku ke subi seru di Brandaris tin di yega promé ku mitar di dies di mainta, si e yega mas lat, e lo tin di pasa via di ruta largu pa asina e yega subí Brandaris.
Pa mas informashon por yama Junny Janga (mènedjer di Parke Washington) na 786-5229.