December 17th, 2010: Sambuyá rÒnt di Klein Bonaire den un solo biaha

Míles di amante di naturalesa i sambuyadó ta bishitá Boneiru tur aña. Un pèrla bírgen di Karibe Hulandes i lugá di bida natural inolvidabel. Riba djaluna, 27 di desèmber, Leo Hoogenboom i Felix Faassen lo bai hasi un fundraising pa STINAPA i Sea Turtle Conservation Bonaire (STCB) dor di trata na landa bou di awa rònt Klein Bonaire den un solo biaha. Di e forma aki tambe nan ke konsientisá pueblo di Boneiru i tur bishitantenan tokante konservashon di naturalesa di Boneiru i duna un aporte pa e eko-sistema keda preservá awor i den futuro. E trayekto ta di mas ku 10 km i lo tuma e dos sambuyadónan masoménos 12 ora pa kompletá. Esaki ta dependé tambe di kondishon di tempu. Nan lo tin eskorte di un tim di asistente ku ta sigui nan den boto. Lo filma nan i tambe lo saka nan pòrtrèt. Spònser ofisial di e evento ta Captain Don's Habitat. STINAPA Bonaire Stichting Nationale Parken Bonaire (STINAPA Bonaire) ta un fundashon NGO (Non-Governmental Organisation), ku no tin meta di hasi ganashi. E fundashon a haña e tarea di gobièrnu di Boneiru pa manehá dos área protehá di Boneiru: Bonaire National Marine Park (BNMP òf Parke Nashonal Marino Boneiru) i Washington Slagbaai National Park (WSNP òf Parke Nashonal Washington Slagbaai). STINAPA Bonaire ta dediká su mes na konservá herensia natural i kultural dor di uso duradero di su rekursonan. Sea Turtle Conservation Bonaire Sea Turtle Conservation Bonaire (STCB) tambe ta un NGO ku ta dediká su mes na estudio sientífiko i konservashon i ku ta protehando turtuganan di laman for di 1991. E isla chikitu Boneiru ta su sede i tambe ta kas pa 3 di e 6 turtuganan mas menasá di mundu: E turtuga karèt, turtuga blanku i kawana. STCB ta miembro di Wider Caribbean Sea Turtle Conservation Network (WIDECAST) i partner den proyekto ku Dutch Caribbean Nature Alliance (DCNA). Mas informashon: Bishitá nos wèpsait ofisial:   http://www.ecodivebonaire.com Chèk nos página: http://www.facebook.com/ecodivebonaire

« Close window