November 18th, 2010: PARKE SUBMARINO DI BONEIRU RIBA LISTA DI PATRIMONIO MUNDIAL
Kralendijk – E parke submarino di Boneiru ta kandidato pa subi lista di patrimonio mundial; ‘UNESCO world heritage site'. STINAPA ta sumamente orguyoso ku e parke submarino di Boneiru a keda nominá pa ta riba lista di UNESCO komo un di e sitio nan di patrimonio mundial.
Ta for di aña 2002 gobièrnu di Bonaire pa medio di un karta a hasi e petishon na gobièrnu di Antia di e tempu ei pa kuminsá ku e trámitenan pa pone e parke submarino di Boneiru riba e lista di patrimonio mundial di UNESCO. E aña aki gobièrnu di Boneiru a risibí kopia di un karta, ku ministerio di kultura di Hulanda a manda pa señora Emily de Jongh Elhage, informando e ku e ministerio a traha un komishon ku tin e nòmber di ‘Commissie Herziening Voorlopige Lijst Werelderfgoed'. Kada 10 aña Hulanda ta revisá e lista di nominadonan ku nan tin pa entregá na UNESCO. E biaha aki e ministerio a pidi e komishon pa nan pone mas atenshon riba e islanan di Reino den Karibe. Siguientemente aki na Boneiru, nos a risibí imeil di e sekretariado di e komishon ku nan lo manda algun miembro Boneiru pa bin papia ku nos tokante di e petishon pa nominá e parke submarino komo sitio di patrimonio mundial. Esei tabata un sorpresa masha agradabel mes pa nos, pasobra nos no tabata na sa ku gobièrnu di Antia a manda e petishon pa minister di Kultura di Hulanda na aña 2002. STINAPA ta sumamente orguyoso ku e komishon a pone e parke submarino di Boneiru riba e lista di 9 kandidato, ku minister di Kultura di Hulanda lo presentá na e ofisina prinsipal di UNESCO, na Paris den Aprel di otro aña.
Lo dura mas o ménos 10 aña promé ku tur e 9 kandidatonan lo subi riba e lista ya ku kada pais por tin un kandidato pa aña ku ta subi riba e lista.
Un nominashon riba lista di patrimonio mundial ta nifiká hopi pa rekonosementu di e pais. Speshalmente pa turismo. Hopi turista ta konsiderá sitionan riba e lista di patrimonio mundial komo garantia di un bon produkto.
