July 26st, 2010: PIKOP NOBO PA STINAPA A YEGA .
Resientemente STINAPA Bonaire a haña dos pikòp nobo , unu ta pa Washington Parke i e otro ta pa Parke Marino. STINAPA a risibí fondo pa esaki for di Nationale Postcode Loterij di Hulanda.
Aña pasá e Chief Ranger di nos parke nashonal submarino, Edwin (Din) Domacassé, a keda kondekorá pa su bon trabounan ku el ta hasi pa protekshon di naturalesa i medio ambiente di Boneiru. Nationale Postcode Lotterij, tur aña ta rekonosé esnan ku ta sobre salí den nan trabou. Wereld Natuur Fonds di Hulanda ku ta un di e benefishadonan di Nationale Postcode Lotterij a nominá Din . Din a gana e premio i e l a risibí e ‘Gouden Wimpel' i tambe 20.000 euro di Nationale Postcode Lotterij. Ku e plaka aki, STINAPA a kumpra dos pikòp, un pa e parke submarino i un pa e parke Washington Slagbaai.
STINAPA Bonaire ke gradisí Wereld Natuur Fonds i tambe Nationale Postcode Loterij di Hulanda, pa e donashon aki. El ta duna nos e oportunidat pa hasi nos trabou mas mihó.
Pa asina nos yunan i nan yu tin un futuro, i nan por gosa di nos bunita naturalesa riba tera i bou di awa.
