June 6st, 2010: Selebrashon, dia habri na Parke Nashonal Washington Slagbaai

 

Djadumingu dia 6 di yüni STINAPA a konmemorá huntu ku Marshe di Rincon i pueblo di Boneiru na entrada di Washington Park e hecho ku 41 aña pasá plantashi Washington a bira área protehá. Den e kuadro di aña internashonal di Biodiversidat, STINAPA ta duna pueblo di Boneiru e oportunidat pa nan partisipá i eksperenshá e áreanan protehá. Asina nan por gosa di e bunitesa di naturalesa i bira mas konsiente di e importansha di protekshon di nos biodiversidat. Mas ku seisshen hende a drenta parke djadumingo último. For di mainta tempran a kuminsá ku desayuno, kuminda krioyo i barbekiú na entrada di e parke. Pueblo i bishitantenan di Boneiru a kana, subi seru, kore baiskel, i a landa na Slagbaai. Tabatin tremendo show kultural, músika i bailamentu na Parke Nashonal Washington Slagbaai.

.	For di 8'or di mainta doñonan di stènt di Marshe di Rincon a kuminsá instalá nan produktonan i bende desayuno. Pa mèrdia e kuminda krioyo tabata kla i tambe e barbekiú. Henter dia nan a bende bolo, kosnan di boka dushi i diferente artefaktonan di obra di man i mata. E ambiente musikal tabata na enkargo di fundashon Arte i Kultura kende tambe a sòru pa tin un bar bon surtí. Músika tabata na enkargo di grupo Tuti Fruti, ESO, Glenn i su Gèng, SOG i Proyekto 2000 plus. E públiko a balia i gosa na su mesté
Basta hende, grandi i chikí, a partisipá na e tournan ku guia ku STINAPA a ofresé. Nan a subi Brandaris, a kana e kaminata di Lagadishi, a landa na Slagbaai i a risibí informashon den e museo riba e diferente eksebishonnan ku tin.		Mas ku seisshen persona a bin selebrá huntu ku nos ku e promé Parke Nashonal di Boneiru i Antia a kumpli 41 aña. STINAPA ta yama danki na Fundashon Marshe di Rincon i Fundashon Arte i Kultura pa nan koperashon i partisipashon den e selebrashon. Tabata un dushi dia i tur kos a bai na òrdu, pueblo di Boneiru a mustra un biaha mas ku nos ta nèchi hende.

 

« Close window