DIA HABRÍ NA LAC
Kralendijk – Dia 22 di mei ta dia di biodiversidat. Biodiversidat ta e variedat di bida na mundu. Humanidat tin un reto grandi pa trata na skapa e biodiversidat di mundu. Den e delaster 5 desena di añanan e variashon di mata i bestianan na mundo a bai atras masha tantu mes. Humanidat ta dependé di biodiversidat pa su sobrevivensha.
Djasabra dia 22 di mei, STINAPA huntu ku TCB ta bai organisá un dia habrí na Lac. A skohe Lac pa motibo ku e sitio ei ta unu kaminda diferente eko sistema ta bini huntu den un área protehá pa lei: palunan di mangel, yerba di laman, ref di koral, paranan, piska, turtuga, karko i insketonan, djis pa menshoná algun. Riba e djasabra aki, nos lo selebrá ku Boneiru ta hasi su bèst pa protehá biodiversidat i lo pone atenshon riba e puntonan ku nos falta ainda pa traha riba dje.
E dia lo ta uno yená ku aktividat; lo tin beach volleyball, bulamentu den saku, rankamentu di kabuya, pintamentu, i tour edukativo. E weganan lo ta bou di enkargo di INDEBON. Lo tin un bar i kushiná bon surtí. E bar lo ta na enkargo di e tim di vòli, Galaxia. Nan lo enkargá ku organisashon di e weganan di vòli. Lo tin premio ku Banko Maduro a spònser pa tim ganadó di e weganan. E tim di windsurfing, Aquaspeed, ta organisá weganan di Bon kuné. STCB lo organisá un limpiesa bou di awa. Lo tin kuminda surnam, lokal i alaparia, tambe kos dushi, arte i joyas.
Antes Lac tabata un sitio kaminda famia tabata bai landa, awor masha poko hende lokal ta bai Lac. Ku e aktividat na Lac STINAPA ke bolbe será pueblo konosí ku un dushi área di rekreashon ku nos isla tin.
Ta spera famia kompleto na Lac pa dibertí i pasa un dushi dia.
Written by Elsmarie Beukenboom
