DIA 22 DI MEI TA DIA INTERNASHONAL DI BIODIVERSIDAT

Kralendijk; Nashonnan Uní a proklamá aña 2010 komo aña internashonal di biodiversidat. Biodiversidat ta e variedat di bida ku tin riba e planeta tera. E selebrashon di biodiversidat ta un selebrashon di bida na mundu i di e balor ku biodiversidat tin riba humanidat. Dia 22 di mei lo selebrá dia di biodiversidat na Lac.

Durante di e aña aki di biodiversidat, ta pone atenshon na e variedat grandi di mata i bestia ku Boneiru tin i e importansha di nan. Nos isla ta un isla riko pasobra nos tin un variedat grandi di mata i bestia. Asina tin alrededor di 500 diferente sorto di mata i 1050 diferente sorto di bestia. Tin hende sa haña bestia un molèster i ta buska moda di kaba ku nan. Pero tur bestia i mata tin nan funshon na benifishi pa humanidat. E ratón djanochi porehèmpel ta kome e sanguranan ku ta molestia nos. E ta un bestia untíl. Asina tambe mata i palunan ta útil pa hende. Bonerianonan mester ta orguyoso. Nos isla tin un variedat grandi di mata i bestia. Nos no ta para ketu na e rikesa ku nos tin den nos naturalesa, esei pasobra naturalesa ta forma parti di nos bida diario i el a bira gewon pa nos. Poko di nos ora nos wak un palu di sia, e chuchubi Spaño, òf e para di misa ta para ketu na e echo ku ta aki na Boneiru i algun otro lugá den bisendario só tin e espesienan aki.
Rònt mundu matanan i bestia ta na peliger pa motibu ku hende ta sea kaba ku nan òf ta kita nan area di biba. Esei ta hasi nan speshal, pa nos i pa mundu.Hopi hende ta pensa ku un espesie no por kaba. Nos no tin di bai muchu leu pa sa ku esei si ta posibel. Masomenos 60 aña pasá na Aruba tambe nan ta tin lora meskos ku aki. Awe nan no tin lora mas. Anto ta unda nos kangreunan ta? Kasi no ta topa ku kangreu mas. Porta muchanan ta kere ku ta kangreu di laman so tin, nan lo no sa mes ku tin kangreu di riba tera tambe pasobra nan no sa wak nan.

Durante di e aña aki STINAPA ta bai duna publisidat na e mata i bestianan di Boneiru. Lo usa medionan di komunikashon pa splika dikon ta asina importante pa e hende, pa mantené e variedat grandi di mata i bestianan ku e isla aki tin.
Huntu ku TCB, STINAPA ta bai organisá na Lac un dia yená ku diferente aktividat pa publiko general. A skohe Lac pa selebrá dia di biodiversidat dia 22 di mei, pasobra Lac ta un sitio ku un biodiversidat grandi. Reservá dia 22 di mei i keda pendiente pa mas informashon.

Written by Elsmarie Beukenboom

« Close window