April 28th, 2010: EKSITOSO KAMINATA DI DIA DI MAMA TERA 2010
Den e kuadro di Dia di Mama Tera (Earth Day), STINAPA Boneiru huntu ku Sòldachi Tours a organisá un kaminata den área di Rincon, Dos Pos. E aña aki nos a selebrá e di 40 aniversario di Dia di Mama Tera.
Tur hende tabata invitá pa a partisipá na e kaminata di djadumingu 25 último. E kaminata tabata bou di guia di señora Maria Koeks i su guianan profeshonal. Mas ku sinkuenta pèrsona a partisipá. Nan por a gosa di e bunita naturalesa di Boneiru. E mondi tabata bèrdè bèrdè despues di e yobida ku tabata tin algun siman pasá. Masha bunita bista di e serunan i di Gotomeer.
Despues di e kaminta e grupo a sinta konbersa na e kunuku ‘Ticurius Hill' di Rudy Balentin. Elsmarie Beukenboom, direktor di STINAPA a yama danki na tur e pèrsonanan ku a partisipá na e kaminata i tambe na e guianan di Sòldachi Tours. El a splika ku e aña aki ta selebrá aña di biodiversidat i kiko esei ta nifiká pa Boneiru. Kiko ta e efektonan ku e kambio di klima tin riba nos isla kaba i ki efekto por tin den futuro. Esnan presente a trese dilanti e urgensha pa pueblo kuminsa produsí su mes kuminda. Pa hende kuminsa ku plantashon chikitu den kurá di nan kas i asina hasi su mes menos dependiente di produktonan importá.
E ruta di Dos Pos aki ta bale la pena i STINAPA ta rekomendá tur hende ku gusta kana den naturalesa pa tuma kontakto ku Sòldachi Tours di Maria Koeks pa nan tambe por bai kana e ruta aki.
