April 21th, 2010: KAMINATA DI DIA DI MAMA TERA - EARTH DAY - DJAMARS DIA 22 DI APREL
E aña aki ta selebrá e di 40 aniversario di Dia di Mama Tera – Earth Day. Awe mas ku nunka, nos planeta ta na peliger. Kambio di klima mundial ta un di e retonan di mas grandi di e era aki. Pero e situashon alarmante aki tambe ta krea oportunidat pa huntu nos por traha riba un mundu mas saludabel, seif i un medio ambiente den bon harmonia i un ekonomia ku energia mas limpi.
Riba su mes kambio di klima no ta nada straño. Esei a tuma lugá semper den pasado. E terasanan di piedr'i kalki na kosta di Boneiru ta prueba di esei. Pero e biaha aki tòg ta otro. Ta hende ta kousa di e kambio di klima, miéntras ku den pasado ta naturalesa tabata e kousa. E klima ta kambiando asina lihé ku naturalesa no por mantené e velosidat ku kual e kambio ta tuma lugá i e klima ta bruha.
Kiko esei ta nifiká pa nos na Boneiru?
Ta konosí pa basta tempu kaba, pero for di resien humanidat ta kuminsá realisá esaki mas mihó i tin diferente prueba kaba. Nos klima ta kambiando den un tempu rèkòrt.
I ta nos mes ta e kousa. For di kuminsamentu di Revolushon Industrial nos ta kimando nos reservanan di kombustibel fosil pa haña energia. Den e proseso di kimamentu di kombustibel fosil, manera karbon, zeta i gas, kantidat grandi di bióxido di karbon (CO 2 ) ta drenta den nos airu. Bióxido di karbon ta un tipo di gas ku nos ta yama “gas di invernadero” (Na Ingles ta yam'é “Greenhouse Gas” i na Hulandes “ Broeikasgas”. Un invernadero ta un lots di glas ku ta usa hopi den paisnan friu pa por tene e kayente paden pa kria mata ku normalmente no por krese den un klima friu).
Gasnan di invernadero den nos atmósfera tin e efekto manera den un kamber ku un bentana grandi; rayonan di solo por drenta, pero e kalor no por sali. Temperatura na mundu ta subi, ku resultado ku klima ta kambia. E resultadonan por ta hopi severo.
Nos ta selebrá e dushi naturalesa nos tin!
Te ainda Boneiru ta bendishoná ku un naturalesa masha bunita i ku un gran balor. STINAPA Boneiru, huntu ku Sòldachi Tours ta organisá un kaminata den área di Rincon, Dos Pos. Asina e hendenan di Boneiru haña e chèns pa bin fula, hole i tende nos naturalesa, bou di guia di señora Maria Koeks i su guianan profeshonal di Rincon. Dia 25 di aprel, 7'or di mainta, nos lo reuní i sali fo'i ‘Ticurius Hill' na altura di Dos Pos, kana e ruta di piedra ros di Dos Pos via Gotomeer. Esaki lo tuma mas òf ménos 2 ora, na final di e kaminata lo parti fruta i sòpi.
Tur hende ta invitá i partisipashon ta grátis. Pa inskripshon i mas informashon tuma kontakto ku ofisina di STINAPA, na telefon 717 – 8444, promé ku dia 23 di aprel 12 or.
