April 4th, 2010: KUIDO PA NATURALESA I MEDIO AMBIENTE TA UN ASUNTU DI NOS TUR
Kralendijk. Un mayoria di e poblashon di Boneiru ta di opinion ku kuido pa naturalesa i medio ambiente ta un asuntu di nos tur. Esei ta resultado di un enkuesta ku Centraal Bureau voor de Statistiek (CBS) a tene bou di 250 unidat doméstiko riba petishon di STINAPA. Tabata e segundo biaha ku a tene un enkuesta grandi asina tokante naturalesa i medio ambiente. Promé biaha ku a hasié tabata na 2006, kaminda a midi e situashon na kuminsamentu di e kampaña di konsientisashon “NOS TA BIBA DI NATURALESA”. Lo tene un enkuesta un biaha mas den futuro pa asina midi e efekto di e kampaña.
Mas ku dos tersera parti di e unidatnan familiar na Boneiru a yega di tende di e kampaña, a sinti nan mes konektá ku e kampana, i ta haña naturalesa i medio ambiente importante. Ademas, kasi tur hende ta di opinion ku tin mester di regla pa protekshon di naturalesa i medio ambiente.
Un mayoria grandi ta di akuerdo ku e ponensia ku ekonomia di Boneiru ta fundá riba turismo. Mesun kantidat di hende ta pensa ku turismo ta fundá riba naturalesa. Kasi mitar di esnan entrevistá ta haña turismo importante pa su entrada personal, i tambe ta di opinion ku e lema NOS TA BIBA DI NATURALESA ta kuadra bon ku e kampaña mes.
Un mayoria di hende ta pensa ku e kuido pa naturalesa i medio ambiente ta un asuntu di nos tur. Na 2006 ta solamente dos tersera parti tabatin e pensamentu aki. E tempu ei, un kuart di tur persona tabata kere ku naturalesa i medio ambiente ta responsabilidat di STINAPA. Esaki ta un resultado ku STINAPA ta hopi kontentu kuné. Kasi tur famia entrevistá tabata preukupá ku naturalesa i medio ambiente. Na 2006 tabata hopi ménos, dos tersera parti pa ta eksakto. E sintimentu pa ta dispuesto pa drenta akshon ta grandi. Kasi tur hende ta dispuesto pa yuda protehá naturalesa i medio ambiente.
Informashon tokante naturalesa i medio ambiente ku ta sali di parti di organisashonnan di naturalesa i medio ambiente ta ser konsiderá konfiabel dor di tres kuart di e unidatnan doméstiko. Aki tambe tin un kambio positivo si ta kompará ku 2006. Solamente un tersera parti di esnan entrevista a konsiderá informashon ku ta sali di parti di gobièrnu komo konfiabel.
Un tersera parti ta na altura ku gobièrnu tin un Plan di Maneho di Naturalesa. Na 2006 tabata solamente un kuart. Pero ainda dos tersera parti no sa di e Plan aki. E Plan di Maneho di Medio Ambiente ta kasi deskonosí. Konosementu di maneho di gobièrnu enkuanto naturalesa i medio ambiente no ta masha grandi.
A tene e enkuesta aña pasá. Si nos kompará e resultadonan di 2006 ku esnan di 2009 nos por ripará ku e kampaña di konsientisashon a mehorá e akseptashon i apoyo pa mantenshon di naturalesa i medio ambiente na Boneiru.
