February 8th, 2010: Alumnonan di skol básiko a bai kayak riba dia Internashonal di áreanan húmedo
En konekshon ku dia Internashonal di áreanan húmedo dia 2 di febrüari último, STINAPA a tene un loteria pa eskohé un skol pa bai kayak. Pa skohe e ganadó a pone nòmber di tur e skolnan básiko den un kònteiner i un Marine Park Ranger a saka un nòmber afó. Suerte a toka na skol Aquamarine.
E skol a skohe 14 alumno pa bai hasi e eskurshon ku kayak den e área di Lac.
Ku kayak nan por mira e palu di mangelnan mas di aserka, wak kua ta e organismonan ku ta krese na e raisnan di e palunan aki i pa motibu ku e awa plat di Lac ta asina kla, nan por wak bou di awa i mira e piskánan, yerba di laman i tambe e kwalnan kabes abou. Nan guia a splika nan ta kiko ta e funshon i importansha pa naturalesa di e organismonan ku nan ta mira i pakiko tin di konservá nan.
E tarea a keda na e skol pa laga e alumnonan aki pasa nan informashon na un manera òf otro na e otro alumnonan di nan mes edat ku no a haña e oportunidat di a bai e ekskurshon. E eskurshon tabata un éksito rotundo. E alumnonan a risibí hopi informashon valioso tokante di Lac, un área húmedo di importansha pa Boneiru. Aki na Boneiru tin sinku sitio ku ta protehá internashonalmente pa tratado di RAMSAR esta; Lac, Pekelmeer, Gotomeer, Slagbaai i Klein Bonaire.
E alumnonan a risibí informashon riba founa, flora i e tratado di RAMSAR. E tratado di RAMSAR ta un tratado internashonal pa protekshon i konservashon di áreanan húmedo rònt di mundu,E evento aki a tuma lugá danki na e koperashon di ‘Mangrove Information Centre’. Danki na Elly Albers, e mènedjer di e sentro di informashon aki, ku a pone e fasilidat disponibel pa edukashon di naturalesa na e studiantenan aki. Otro aña dia 2 di febrüari lo bolbe selebrá e dia Internashonal di áreanan húmedo.