February 4th, 2010: E porta di sùit di e Parke Nashonal Washington Slagbaai ku ta bai stret pa Slagbaai ta habri pa públiko riba e promé djadumingu di tur luna
Públiko por kumpra e pas di aña ku ta kosta fl. 17.50 i ta bálido pa henter aña. Ta bende e pas di aña aki na entrada prinsipal di e parke òf na ofisina di STINAPA. Tambe ta bende nan na tur skol di buseo na Playa. Pa motibu di siguridat, lo no atendé ku sèn en efektivo na porta di sùit.
Si un hende no ke kumpra e pas di aña e lo tin di paga fl 5 kada biaha ku e ke drenta parke i e tin di paga esei na e entrada prinsipal i bin ku e bòn porta di sùit. Pa fasilitá e públiko, STINAPA lo tene un lista di tur hende ku a kumpra e pas di aña. E pas ta riba nòmber di un pèrsona i no por pasé pa otro hende. STINAPA ta keda ku e derecho di puntra su bishitantenan pa identifikashon ora tin duda si e pas ta di e pèrsona asina ku nos ta rekomendá tur hende pa bin ku nan sédula. Si e pèrsona no por komprobá ku e pas ta di dje, e lo no por drenta e parke. Entrada ta grátis pa mucha te 12 aña.STINAPA ta invitá pueblo bin gosa di su parke, e naturalesa di Boneiru, i landa den un laman dushi i gosa di un bich di santu blanku fini. Tur regla di e parke ta konta. No por drenta e parke despues di kuartu pa tres i tin di sali for di Slagbaai 4 or.