OUTREACH - PARROT NEWS

Ta un temporada drùk pa e loranan di Boneiru, pero tambe pa e sientífikonan ku ta studia e loranan ei. E paranan ta brui i te asta tin di nan ku tin yu den nan nèshi kaba. Pa 2007 e proyekto di lora tin e website  nobo  ku ta laga e bishitantenan wak vidio di lokual ta pasando den e nèshinan di lora. Bo por atmirá e loranan, ku ta den peliger di nan eksistensha, den nan intentonan pa kria nan yunan.Hendenan rònt mundu por wak Boneiru su loranan ora nan webunan ta sali i nan yunan ta kresiendo. Regularmente nos lo publiká un ‘Parrotwatch Update’, di moda ku bo por lesa kiko ta pasando den e nèshinan si bo ke wak e vidionan bo mester bai www.parrotwatch.org.

Na e momentu aki e loranan ku nos a yama  Wancho i Wanita ta e paranan ku nos a lkapta riba kámara. Wanita rápidamente ta transformando den e superstrea, i asta e lo kontestá tur bo preguntanan den su propio kolumna.

Meer informatie over het project en de onderzoekers kunt u vinden op: www.parrot.group.shef.ac.uk.

» ParrotWatch in English
» ParrotWatch in het Nederlands

Fundashon Salba nos Lora

Si bo tin pregunta pa Wanita dirigí esei pa Olivia@parrotwatch.org

Update di e tim di lora (October 26th, 2007)

Awor si e dianan a pasa kaminda e relatonan di e grupo di Parrotwatch tabata yen di tristesa i malai. Lo nos no tin esei mas den e Paraiso di Lora ! Na lugá di esei e siman akí nos tin notisia hopi alentador  i asta un historia prèt ku nos ta yama “The Amazing Adventures of Wee Ben”. (E Aventuranan Fantástiko di Ben Chikí).
E miembronan di e tim di Lora a kuminsá ta duna e nèshinan di Lora poko nòmber úniko pa por distinguí nan for di otro. E miembronan ta laga nan imaginashon bai, pa por yega na e nòmbernan mas sofistiká posibel. Dependé di nan estado mental si e nòmber tabata rekerí mas fantasia ku otro dia. Por ehèmpel tin un nèshi ku nan a batisá komo “Far Far Away ( Hopi Leu Ayá), ku a haña su nòmber riba un dia ku nan tabata bon kansá i tin un otro ku a haña e nòmber “ Boulder’ ( Baranka). Segun nan mes ta bisa e nòmber ei a bini pasobra nan tabatin tiki fantasia e dia ei. I tabata riba un djabièrnè lat serka di Happy Hour ku nan a haña e nèshi ku a haña e nòmber di un dushi kòktel brasileño esta “Caipirinha”.
Asina a yega tambe na e nòmber di e nèshi: “Bill”. Esei tabata simplemente pasobra e ta zona ku e palabra ingles pa seru; “Hill”. Pa hiba e kos un tiki mas leu, nan a duna e famia di Lora ku ta biba einan e nòmber di “Ben’, pasobra esei ta zona ku e palabra eskoses “Glen” . I ‘Glen’, manera e bon bebedónan di whiski di Eskosia sa, ta e palabra pa un vaye (e tereno entre dos seru) . Asina tin Mama Ben, Papa Ben, i “Wee Ben”. ( Wee ta e palabra eskoses pa ‘Chikí). E hendenan akí si tin fantasia, bo n’ ta haña? Pero pa nan ta un bon manera pa distinguí tur e nèshinan for di otro i e ta pone nan kòrda nan pais natal tambe.
Ta tokante e nèshi di famia Ben e historia akí ta bai. E nèshi di famia Ben a produsí únikamente un yu, ku por deskribí mihó komo e yu di Lora mas malkriá ku bo por imaginá bo, ku mal manera i ku un beis ku semper ta malu. Pero, ya, komo mayor bo mester stima bo úniko yu, no ta bèrdat? By the way, bo mester ta konsiente ku yunan di Lora ta lokual ku nan ta yama sientífikamente “Monomorphic”, esei ke men ku bo no por distinguí si nan ta hòmber òf muhé. Pero pa fasilidat nan a dun’é un nòmber di mucha hòmber, pasobra esei ta pas mihó ku un mala mucha. 

Resientemente dos miembro di e tim di Lora a bai bishitá “Wee Ben” pa wak kon el a desaroyá. E momentu ku nan tabata riba kaminda nan no por a pensa ku e dia lo terminá den algun minüt di teror i angustia. Si bo no konta aden komo motibu pa tenshon ku e hendenan di tim di Lora tin bia mester baha for di baranka haltu na kabuya fini pa wak den nèshi, sabiendo ku si bo kai niun hende lo no bai buska bo drechi un bes,  e dianan di e hendenan akí ta relativamente trankil. P’esei un kos manera dia nan a bai bishitá “Wee Ben’ ta bal la pena di konta. I pa e motibu ei nos ta sigui ku;

“E Aventuranan Fantástiko di Ben Chikí”

Tabata un otro mainta fasinante den e serunan di Washington Slagbaai Parke Nashonal. Wee Ben a habri su wowonan den su nèshi skur pero kómodo i a kuminsá prepará su mes pa un otro dia di su bida. Pa bo sa, e preparashonnan ei no ta tuma masha tempu. Si bo konsiderá ku gran parti di su dia e ta sinta warda su  mayornan yega ku su kuminda, kome e kuminda ei, krese un tiki di e kuminda i bolbe bai af . Dushi bida!
Pero “Wee Ben” ta kasi un adulto awor i pronto e dia ta yega ku e lo mester sali for di su nèshi seif i bai biba ku e otro loranan den mondi. Esta si niun sinbèrgwensa hinka den su kabes pa sakia su nèshi, bai kuné i hink’é den un kouchi chikitu. Eiden no ta rest’é nada otro ku no ta di keda su 30 aña di bida sin niun aktividat físiko, stimulashon mental i un dieta inatraktivo.
Danki Dios esei no ta e kaso ainda ku “Wee Ben”. Awe el a lanta bou di  flùitmentu bunita di trupial i chuchubi. Ménos ku un mei ora despues ya “Mama Ben’ a yega ku su bushi yen di kuminda p’e. E dunamentu di kuminda akí ta mihó deskribí komo un par di sekònde di káos total kaminda “Wee Ben” ta hasi un desórden di otro mundu ora e mira su mama drenta den e nèshi. Golos manera e ta, e ta habri su boka i ta purba di gara su mama su boka pa esei por depositá e kontenido di su bus den “Wee Ben” su boka. Esei por zona un tiki fis, pero esei ta naturalesa. En todo kaso, tabata 12 ora promé ku “Wee Ben” a kome i e ta mal hambrá. E ta sagudí su kabes asina duru ku e piknan ta lòs for di otro i Mama Ben ta saka basta kuminda riba su kabes, promé ku e por realisá esaki i stòp. Asina mitar di e kuminda ta bai pèrdí. Ora e pober mama sali for di e nèshi, “Wee Ben” tin hamber ainda i e ta sigui ku su beheit te ora su tata yega i duna un segundo porshon di kuminda. Ta e ora ei numa “Wee Ben” su barika a yena i e por bai sinta digestioná e kuminda.
Mama ku Papa Ben despues a bolbe den e serunan di Washington pa sigui buska ko’i kome.
Pero diripiente un man humano ku a drenta su teritorio a stroba e trankilidat di “Wee Ben’. El a purba di skonde den e huki mas leu di e nèshi pero e no por a skapa di e man. E nèshi ku a ofres’é asina hopi siguridat a bira un trampa ku e no por a sali mas for di dje. Ferosmente el a purba di defendé su mes dor di morde kaminda e tabata por i grita sin miserikòrdia. Pero nada por a evitá ku diripiente e man di e sientífiko a lastr’é bin afó kuné. Aunke e proseso akí por zona horibel bo mester realisá ku e hendenan di tim di lora ta hasi tur esfuerso pa minimalisá e strès pa e paranan. I nan ta hinka nan bek despues di un par di minüt, miéntras e hendenan ku ta kue lora ilegal pa hasi negoshi ta kita nan for di nan mama ku tata pa semper. 
“Wee Ben’ su wowonan a adaptá lihé na e lus briante pafó di su nèshi i e ambiente nobo ku el a haña su mes aden. E sientífikonan tabata bir’é rònt pa inspektá su kurpa, studia bou di su plumanan pa wak si tin insekto maligno i midi tur kos. Mientrastantu “Wee Ben” tabata sigui hasi tur kos pa e lòs su mes di e mònsternan akí. El a sigui morde i huña nan kaminda e tabata por, pero tambe e tabata distraí pa tur e kosnan bunita ku e tabata mira, manera kaktes, palu i mata i un shelu blou. Su wowonan no por a kere tur kos. T’esaki tabata e lugá di kua su mama a kont’é dia e tabata mas chikitu?

Turesten e sientífikonan tabata keda murmurá ku otro; “Dos shentinobentisinku gram, 128 milimeter, niun pluma fini mas den su rabu. Esaki ta kla pa sali for di nèshi. Bo por want’é p’ami un ratu?”
Ta e momentu ei “Wee Ben” a sinti e man ku tabata ten’é los un tiki, siendo ku un otro man a yega serka. Sin pensa dos biaha el a manda su huñanan den e man ku tabata ten’é i a morde e dùim ku tabata aserkando ku tur su forsa. Esaki tabata nèt sufisiente pa kousa un momentu ku tur dos man a laga bai i esei tabata e momento ku “Wee Ben” a puntra su mes : “Alanan, pa kiko mi tin boso anto ?”. I bai el a bai. Su plumanan ku nunka a pusha airu ainda no tabata asina stabil pero desidido pa hui el a saka kareda. Ainda e no tabatin e bon kordinashon entre su wowonan i su alanan pa nabegá entre e palunan pero tòg el a logra di distanshá su mes un tiki.
E dos sientífikonan a tuma un sekònde pa rekuperá di nan spantu promé ku nan a saka kareda su tras. Nan a benta tur buki ku informashon balioso ku pèn i aparatonan sofistiká pa midi abou. Nan no a pensa kon sumpiña di kadushi lo hinka nan, ni kon e matanan lo raska nan. Nan mester a kue e lora ei bèk ! Si e bai pèrdè e ta muri di hamber i nan lo a faya di konservá un lora mas. Esei hamas lo por pasa ku nan!
“Wee Ben” ku su barika yen di kuminda i ineksperenshá den bulamentu no por a logra di gana altura i e hòmbernan su tras na nan turno tabatin problema ku e barankanan i e matanan, pero tòg nan tabata yegué  pokopoko. Un dado momentu un di nan a yega asina serka ku e por a purba di kue bèk. El a djis logra di mishi kuné pero esei tabata sufisiente pa saka “Wee Ben” for di balanse i el a dal abou ku un bunita kòp-ròl.
El a keda wak rònt un tiki konfundí i miéntras e tabata puntra su mes: “ Pero ta bula m’a bula awor ei?” sinku dede largu e sera rònt di su kurpa atrobe, i nan a kargué bek pa su kas, p’e keda obra di e dia.

Esei si tabata basta aventura pa tur e partidonan p’awe!

Update di e tim di lora (October 22nd, 2007)

Lamentablemente nos a pasa den otro siman tristu pa loke ta e notisia di e loranan di Boneiru i di e parehanan di lora di Parrotwatch en partikular.
Tur kuater yu di lora di e nèshi di Watakeli a muri. E nèshi tabata yen di vruminga ku probabelmente a mata e pober bestianan tambe. E nèshi ku ta kologá tambe a sufri un pèrdida. E yu di Lora ku nos a menshoná siman pasá ku no tabata bai muchu bon, tambe a muri lástimamente.

E aña akí no tabata muchu bon pa e loranan te ainda. Na kuminsamentu di e temporada di brui nos a konta 31 nèshi ku tabatin webu aden. Awor aki ta solamente 15 di nan ta aktivo ainda. Ku otro palabra; nos a pèrdè un tiki mas ku mitar. E mayoria di e pèrdidanan akí ta pa motibunan natural klaramente i esaki den un sentido ta tene e poblashon fuerte i salú tambe, pero e ta pone ku e efekto di kuementu di yu di lora for di nan nèshi ta bira mas hopi i mas severo. I ta poko para ta keda pa reforsá e poblashon liber den naturalesa.

Pero no ta notisia malu so tin. E bon notisia ta ku e tres yunan di Lora ku a keda den e nèshi ku ta kologá ta bayendo masha bon. Nos tin nan grabá riba vidio i esaki naturalmente bo por wak riba e website di ParrotWatch.

Por fabor yuda nos kousa dor di bishitá www.parrotwatch.org. Ta kosta solamente $ 8 pa bira spònser i pa e plaka ei bo por wak masha hopi vidio inkreibel di nos loranan den nan nèshi den naturalesa.